工作除咗為咗份人工之外，仲為咗好多其他福利。尤其今時今日嘅打工仔，係會追求各式各樣嘅員工福利。講真，人工其實道道都差唔多，唔同嘅福利可能係令求職者答應被取錄嘅決定性因素！而本身已經受聘嘅員工喺續約嘅時候更加會傾向追求更好嘅福利而唔係加人工。世界各地嘅企業就住呢一點，制訂咗唔同嘅福利同好處吸引新同事同挽留現有員工。知道吓出面其他公司有咩offer，對你傾contract絕對有着數！

‍

以下係一啲喺香港比較少見嘅工作福利：

1）屈臣氏集團：佢哋好注重員工嘅身體同精神健康，所以佢哋嘅福利係有助員工維持健康嘅，例如如果你返返下工肚仔唔舒服，佢哋喺火炭嘅辦公室就已經有員工診所。嗰度仲有健身室，設有午飯時間健身課程幫助員工keep fit。而對於哺乳媽媽亦都設有哺乳房間，方便餵人奶。

‍

2）亞洲萬里通：因為公司同國泰航空公司有聯繫，亞洲萬里通嘅僱員可以享有機票優惠。呢個福利對於好多年輕僱員非常吸引，尤其嗰啲喜歡週末去個小旅行嘅打工仔。

‍

3）煤氣公司：打工仔返足八個鐘頭工日日坐喺個電腦螢幕前面，好容易會想食高糖分或高脂肪嘅午餐去補充能量。公司認清不良嘅飲食習慣所帶嚟嘅禍害，定期邀請營養師向員工分享健康資訊。喺佢哋嘅辦公室總部亦都有唔同嘅健身設備俾員工使用，等佢哋可以唔使錢做gym，保持身體健康。

‍

4）香港寬頻：香港寬頻嘅員工工時比大部份打工仔短，只返九至五，每個月仲有一個星期五淨係返半日。當呢個星期五撞正公眾假期，仲有得補假添。呢間公司提供比一般員工假多10日，包括一日家庭照顧假期同埋入職周年假期。

‍

5）Foodpanda：提供免費午餐同員工折扣，亦會每個月舉辦聚餐，提供免費飲食俾員工相聚。

‍

6）idNerd Studio：呢間公司主要為賭博業及電競行業提供創新嘅改善方案，所以佢哋會為員工提供彈性工作同遊戲時間一啲都唔出奇。員工亦都可以隨時去玩公司嘅足球機、遊戲機等等，從工作嘅疲勞放鬆一下。

‍

疫情底下，接種疫苗亦都為員工帶嚟唔同嘅新福利：

‍

為咗對抗新型冠狀病毒，配合政府嘅政策，以下公司提供左疫苗福利鼓勵員工接種疫苗：

‍

1）太古集團：接種疫苗嘅員工可以攞到唔同嘅贈品，例如$2000現金券或者旅遊抽獎等等。

‍

2）新鴻基物業：新鴻基物業喺6月4號公布，所有接種疫苗嘅員工及香港市民可以每日參與過千萬獎賞嘅抽獎，獎品包括iPhone 12、酒店住宿同埋各種優惠券等等。

‍

3）恆隆物業：向以接種疫苗嘅員工派發高達$4000電子優惠券， 加上兩日嘅疫苗假期。如果10月31號之前香港員工接種率達七成，所有接種兩劑疫苗嘅員工，包括外判員工亦都會收到$3000電子禮券。

‍

4）中華電力：其中一個福利係為每一位接種疫苗嘅員工同埋接種疫苗嘅員工家人向慈善機構捐出$200 ，而每位完成疫苗接種嘅員工都會獲得額外假期同埋酒店住宿。

‍

5）海洋公園：全職員工會享有兩天有薪假期，而兼職員工則享有額外兩日嘅工資。

‍

6）機場管理局：接種疫苗嘅員工可以參加抽獎，獎品包括11,000張機票。

‍

下次搵工嘅時候，記住除咗要睇薪金制度之外，記住考慮埋員工福利！從一間公司提供俾員工嘅福利可以睇到佢哋點樣對待員工，關心員工嘅乜嘢範疇。