2021年度香港薪酬調查喺過去嘅五月出爐，相信各位打工仔都好有興趣知道自己做緊嘅職位市價係幾多，自己有幾大機會可以爭取更好嘅人工呢？

我哋整合左香港8個熱門行業各個職級嘅薪酬，由非專業到專業，方便大家參考。

1）Marketing 市場營銷

Marketing雖然出名工時長，但係入行門檻低，基本上唔需要指定嘅學位先至勝任，而且工作可以接觸到唔同嘅公司、唔同人，工作要做嘅嘢五時花六時變，絕對唔會沉悶，係好受後生仔女歡迎嘅職業。

啱啱畢業嘅新鮮人通常都由市場推廣助理(Marketing Assistant)或者社交媒體編輯/主任(Social Media Executive/ Officer)做起，負責日常嘅市場推廣工作。呢兩個初階職位人工唔算低，分別係$15,374及$16,750平均月薪。

去到市場推廣主任(Marketing Executive/ Officer)或者數碼市場推廣主任(Digital marketing officer)嘅平均月薪就係$18,329。但係Marketing嘅人工唔算升得快，去到Assistant Marketing Manager或者Digital Marketing Manager平均月薪先至會破$30,000。而最終去到Marketing Director雖然去到$78,000，但係中間嘅職級平均月薪都唔過50,000。

2）公關或企業事務 

另一個好受年輕人歡迎嘅行業就係公關，同樣可以迅速拓展人際網絡，但係稍一不慎就會惹來無可挽救嘅公關災難，壓力都唔係話細㗎！

企業傳訊主任及公關主任嘅平均月薪分別係$18,825及$21,582 ，而高級公關或企業傳訊主任就係$29,657。去到公關經理級別嘅平均月薪都係唔過$34,000。

3）行政及人力資源

比較內向、比較容易社交疲倦嘅人可能會選擇另一條比較容易入行又穩陣啲易行啲嘅路，就係行政及人力資源工作喇。呢個範疇涉及嘅工種非常之多，由接待員到秘書、文員、人力資源主任等等。

接待員及初級文員分別有平均$15,607及$14,000月薪，人力資源助理或者助理人力資源主任月薪就大概$17,000。去到行政人員或高級文員，月薪就分別係$22,000同$20,000。行政主任、高級人力資源主任、各級別人工都係大概二萬，去到經理級別先至會有三萬至到$37,000不等。

4）銷售及業務拓展

銷售及業務拓展各個職級嘅人工升幅就比較大，由營業代表到到高級營業代表就已經差$5000 ，分別係$19,391及$24,450。助理銷售經理及銷售經理同樣係有$5000嘅差距，分別係$33,299及$38,736。而高級銷售經理嘅平均月薪就係$54,000 ，銷售總監月薪就達到$70,000。

5）資訊科技

唔講唔知，資訊科技總監係暫時講過嘅四個行業嘅總監職位之中，人工係最高，高達八萬蚊！除咗資訊科技助理月薪係$17,000之外，基本上所有其他職位人工都唔錯，例如系統分析員、高級分析程式員、分析程式員人工都由$30,000至$46,000不等。去到經理級就會有五萬蚊以上嘅月薪。所以話，資訊科技行業真係新一代嘅鐵飯碗啊！

6）金融業或銀行業

金融業同銀行業相對需要較多嘅專業知識，最低薪嘅櫃檯服務員同客戶經理助理分別係$19,208及$20,625月薪。客戶服務主任同風險管理分析員分別係$26,000及$27,000。營運經理、信貸經理及產品經理大概係$44,000。而最高薪嘅包括有項目經理、風險管理經理及企業財務經理，分別係$53,358、$73,405及$72,833。

7）會計

會計亦係一個傳統嘅鐵飯碗行業，雖然工時長，但晉升機會甚多，一路做落去亦會達到非常唔錯嘅人工。

會計文員及高級會計文員分別係$16,044及$19,010 ，會計主任、高級會計主任及會計主管就係$22,000至到$23,700左右不等。助理會計師、會計師及高級會計師嘅差距相當大，分別係$21,571、$28,462及$34,529。

8）工程

助理工程師及技工或技術員平均月薪相若，大概$19,000 ，高級技術員及工程師分別係$23,436及$29,092。而工程業嘅項目經理就有$51,708。

以上嘅數據來自JobsDB發佈嘅2021年薪酬調查報告，佢哋委托獨立調查機構向本港超過四千名打工仔以網上問卷調查嘅形式收集佢哋嘅資料。詳情可上JobsDB網站了解更多。