自我介紹，係每次見工面試嘅必答題。要從眾多求職者中脫穎而出，必須從自我介紹就俾一個好印象面試官。做齊以下四樣嘢，自我介紹立刻加分！

1）不要CV聲音導航

一般情況下，面試官喺見你之前已經睇過你嘅CV。去到見工你好應該分秒必爭，盡量讓面試官了解冇記錄喺CV上嘅你。若果你好想提提你嘅學歷、履歷，輕輕帶過就可以，反而可以喺見工面試自我介紹中講下你喺職業生涯中影響你好深遠嘅經歷呀、你前同事/上師對你嘅好評等等，甚至可以講下你以往做嘢另你發現左自己有咩不足之處，然後點樣改善等。當然如果可以講返到申請呢份新工嘅原因就更好！

2）表現專業、自然

未必個個都口齒伶俐到可以諗到乜就即刻好得體咁表達。而自我介紹係必答題，的確值得諗好晒內容先去面試。但係切忌寫好成篇文章，連助語詞同連接詞都背埋，好似錄音機咁播返出嚟！喺屋企準備見工面試自我介紹時，可用point form寫低要點，然後對住塊鏡自我介紹，練習組織成完整流暢嘅段落。呢個練習做得多，對其後嘅對答組織都有幫助㗎！

3）千祈唔好誇大/講大話

見工面試毋庸置疑係要突顯自己嘅優點，但千祈唔好誇大其詞或者講大話。試諗下，如果老闆因為你誇大自己嘅能力而請咗你，到時你表現不如佢地預期，只會令雙方難受。其實面試期間絕對唔需要誇大自己嘅能力，冇人係完美，反而承認自己嘅不足之處，表現出肯學肯改嘅特質，更會令面試官欣賞你嘅老實同真試。

4）人地點解要請你？

自我介紹環節其實好能夠突顯求職者嘅思維。是諗吓，如果你係老闆，你會請以下邊一位？

A：「我期望入職後可以學到更多呢個行業嘅運作模式，擴闊我嘅視野。」

B：「雖然我對行情並唔係十分熟悉，但係我可以憑我嘅人際網絡幫公司物色新客戶，擴展業務。」

A先生只集中講得到份工對自己嘅好處，而B先生嘅目光就遠好多，佢會為公司着想，令自己成為公司有用嘅資產。所以喺自我介紹環節，不仿講下你點解適合呢個職位同埋可以點樣幫公司進步，讓面試官知道你嘅目光不止於自己眼前。

以下附上見工自我介紹範例，各位求職者加油！

自我介紹範例(被裁員而考慮轉行)

我有三年任職航空公司地勤人員嘅經驗。好可惜因為疫情，公司被迫裁員，而我亦都要轉行。呢份工培養到我做事細心、觀察力強，經常留意到客人嘅需要。雖然我冇美妝品牌相關嘅工作經驗，但係我一直經常留意美妝品市場嘅最新動向，亦都好鍾意了解身邊嘅朋友同家人喜愛用啲咩產品。我對用家切身嘅了解或者會為貴公司帶嚟新嘅銷售或者產品研發嘅切入點。