「辭職」呢個題目可以好得人驚。我哋會花好長時間心大心細，尤其是裸辭。通常我哋怕處理得唔好會破壞人際關係，又或者擔心自己冇足夠嘅積蓄捱到搵到第二份工。就當我哋真係頂唔順要裸辭，點樣準備好自己，又點樣好好處理呢樣嘢呢？

‍

辭職前5個考慮要點：

1）你係咪準備好要咁做？

決定辭職係一件事，真係辭職係另一回事。面對而家呢份工，你有幾唔開心？嗰種失落有冇影響你嘅私人生活？數據顯示一般人會發4805日工作，而社交只會佔用368日。研究亦顯示高壓嘅工作會對員工造成長期嘅健康問題。除咗健康問題，你亦都會漸漸對你嘅職業產生反感，漸漸埋沒你嘅潛能。

‍

2）你嘅積蓄夠你咬幾耐？

如果你唔係急住要立刻離開工作，你可以自己掌握一下辭職嘅時間。求職時期通常由三至六個月不等，喺冇收入嘅情況下，你本身嘅積蓄夠唔夠用幾個月呢？如果唔係，係咪可以計劃一下幾時辭職，令到冇收入嘅時期減到最短？

‍

3）你係咪一個慣性辭職者？

喺履歷上，一次辭職未必會引起僱主嘅注意，但係如果你連續幾次辭職，僱主就會起疑。面試嗰時，最好準備回答類似「點解你會離開上一份工」嘅問題，最好可以正面地回答，例如雖然你辭職，但你認清左自己係一份工入面想得到啲乜嘢，而你見緊嘅呢份工正正可以俾到你呢啲嘢。

‍

4）點樣保持你自己喺行業內嘅口碑？

突然辭職係一個不負責任嘅舉動，喺公司內惹來不便之餘，隨時會有消息傳咗出去，令行內嘅人對你產生壞印象。要避免俾人唱衰，辭職嘅禮儀一定要做到足。例如親身向上司遞交正式、列印出嚟嘅辭職信。你唔一定要提供辭職嘅理由，但係你應該向上司申明你唔會對公司深懷怨恨，做出對公司不利嘅嘢，並承諾會盡你嘅能力協助交接。你都可以問吓上司希望點樣通知其他同事你將會離職，因為佢哋要接手你做緊嘅嘢。記住，口碑嘅嘢一旦差咗就冇得返轉頭，去到最後一日喺公司都要同所有人好嚟好去。

‍

如果你係因為一啲嚴重嘅原因而決定要立刻離職，並準備好面對所有賠償等等，亦都記住要保持專業嘅態度，切忌單單打打，令到雙方嘅不滿發酵，隨時惹嚟法律行動。熟讀勞工法例對你亦都有好處。

‍

5）你有冇離職規劃？

除咗幫公司入面嘅人交接，你亦都可以花少少時間計劃一下你離職之後嘅時間想做乜嘢。你會點樣增值自己？你希望投身乜嘢行業？搵一份點樣嘅工？ ？問晒呢啲問題之後先辭職，可以令你喺待業期間保持充實。