時代變，連履歷也在變！好多幾年前好興嘅履歷格式，到而家已經唔啱用。擺咗以下呢啲嘢喺你嘅履歷上面，甚至會令你嘅履歷無辜辜落入垃圾堆！

1）亂七八糟嘅格式

一份見得人嘅履歷，同所有見得人嘅重要文件一樣，排版都係需要花啲心機。建議一份履歷上面唔好用超過三種字體，如果你冇乜排版設計呢方面嘅經驗，唔怕用Canva或者Microsoft Word入面嘅現成範本。

2）石器時代嘅工作經驗

當然，當你一畢業出嚟完全冇工作經驗嘅時候，你可以寫你過往所做過嘅所有短期工作，但如果你係職場已經打滾左唔少年頭，而家正準備應徵一份中高層嘅工，列出8至10年嘅工作經驗就已經夠。年代更加久遠嘅工作經驗，可以留返喺面試嘅時候喺傾談中透露。另外，如果你已經畢咗業超過三年， GPA就唔需要再出現喺履歷上面嚕！

3）唔關事嘅工作經驗

你嘅工作經驗可以有好多，但係履歷嘅位置有限，放得上嚟嘅經驗一定要經過精挑細選。你可以以兩個大原則去篩選：一係佢同你申請嘅工作直接有關，一係佢可以突顯你嘅其他才華。唔相關嘅工作經驗可以狠狠咁刪除，如果你最後都係發現同你申請嘅工作有關係，可以喺面試嘅時候透露。

4）圖表

幾年前，好興用圖表來展示自己唔同方面嘅技能，例如Photoshop嘅技能、PowerPoint嘅技能等等，好流行好似打機介面咁畫一條條棒棒去顯示自己用嗰個軟件有幾叻。但係而家時代唔同咗，呢啲不必要嘅圖表更加有可能混淆一啲公司會用嚟幫手揀人嘅「申請人追蹤系統」（applicant tracking system）。呢啲系統有好多種，不過都係一啲幫手篩選符合公司要求嘅申請人嘅電腦系統。俾個電腦系統無辜辜咁篩走你，好蝕底㗎嘛！

5）年齡

如果你相信年齡同能力冇直接關係，就唔好將年齡放喺你嘅履歷上面。

6）古靈精怪嘅email address

呢個非常基本，但係好多人對於乜嘢先係見得人嘅電郵地址都仲有好大嘅分歧。我建議唔好將生日日期嘅年月日任何一個數字放喺email address入面。如果開唔到一個就咁用你全名嘅電郵地址，可以用一啲短寫，或者加底線或一點。寧願人哋睇唔明你個電郵地址係點解，都好過人哋一睇就知道你幾時出世。

7）薪金

人工就留返面試面對面傾啦！

履歷係一間公司接觸你嘅第一道門，花啲心機將呢道門裝修得靚靚仔仔，俾個好印象雇主，見工面試都會順利啲㗎！

另外，呢度有啲面試穿搭嘅建議，不妨都睇吓準備吓啦！