要準備見工面試嘅你，面對網上眾多面試貼士，自然花多眼亂，都唔知睇邊個先好，又唔知睇幾多先夠。我哋整合左以下呢個清單，按住以下呢6個方向準備就實無死喇！

1）衣着

收到面試邀請，第一樣最容易準備嘅就係衣着。視乎面試嘅規模，你要準備嘅衫都唔同。簡單嚟講，男仔恤衫加西褲走唔甩，女仔嘅選擇就比較多，連身裙、恤衫加半截裙、恤衫加西褲都可以，而男仔女仔都一樣，視乎面試嘅隆重程度選擇加唔加外套。

如果你要見嘅係一間規模比較細嘅初創企業，可能約你喺一啲共享空間入面見面，你可以着smart casual，如果你要見一間大公司，或者律師行，全套西裝就會比較好。呢度有啲男女穿搭建議，可以睇一睇。

2）資料蒐集

嚟到準備面試內容嘅部份，第一步係要了解你要應徵嘅嗰間公司。佢哋嘅文化係點嘅呢？佢哋公司近年有啲咩新project呢？如果你知道到時要見邊一位高層，你亦都可以喺LinkedIn或者互聯網預先搜尋下呢個人嘅資料。

3）自我介紹

唔多講喇，呢度有自我介紹嘅範本，自己慢慢睇！

4）熱門題目

面試好多時候都會問啲好類似嘅問題，你可以按住呢一啲至hit題目準備，大部份嘅面試內容應該都已經涵蓋晒。

5）薪酬想像

如果面試順利，面試官通常都會問吓你嘅現時薪酬或者期望薪酬。見呢份工之前，自己最好有一個概念：俾幾多錢你會考慮做呢？萬一人工低過預期，低到一個咩地步你會拒絕呢？呢度有啲關於回答薪金問題嘅貼士，薪金嘅問題真係值得花多少少時間考慮吓。

6）面試當日要帶乜？

• 兩至三份履歷副本（用File裝好）
• 身分證
• 原子筆（用嚟填表或抄筆記）
• 紙或筆記簿（面試期間可以方便抄筆記）
• 水（入去面試之前飲一啖水，冷靜啲！)
• 紙巾（抹汗或去廁所用）
• 梳（去面試途中可能會大風吹亂個頭，臨入去之前梳梳個頭！ ）
• 現金（萬一交通有問題要搭的士）

如果你係視像面試，亦都要準備以下嘅嘢：

• 整齊嘅背景
• 坐得舒服嘅櫈
• 端莊嘅衣着
• 履歷soft copy （隨時有可能要send返俾面試官）
• 紙、筆（方便抄筆記）
• 良好嘅網絡訊號
• 連接電源嘅通訊設備（例如電腦或者電話）

呢度仲有更多關於視像面試嘅貼士！